बनेपा, १० फागुन । काभ्रेपलाञ्चोकको राष्ट्रिय तथा सामुदायिक वनमा लोपोन्मुख र सङ्कटापन्न जडिबुटी फेला परेका छन् । 

महाभारत शृङ््खलाडाँडापारिका गाविसका अधिकांश सामुदायिक वन र राष्ट्रिय वनमा त्यस्ता लोपोन्मुख जडिबुटी फेला परेको जिल्ला वन कार्यालय काभ्रेपलाञ्चोकका वन अधिकृत प्रेम खनालले जानकारी दिनुभयो । 

खासगरी ओखर, लौठसल्ला, जटामसी, सतुवा, सतिसाललगायत जडिबुटी काभ्रेपलाञ्चोकका लागि लोपोन्मुख तथा सङ्काटापन्न अवस्था रहेको मानिएका छन् । “प्राकृतिक रुपमा भएको दोहन र वन डढेलोका कारण जडिबुटी सङ्काटापन्न अवस्थामा छन्” जिल्ला वन अधिकृत खनालले भन्नुभयो । 

उहाँले जडिबुटी संरक्षणका लागि सामुदायिक वनलाई निःशुल्क रुपमा जडिबुटी वितरण र जडिबुटीसम्बन्धी उद्योगमा अधिकतम रु १० लाखसम्म अनुदान दिइने जानकारी दिनुभयो । 

जिल्लामा दुई सय नौ प्रजातिका विभिन्न जडिबुटी छन् । तीमध्ये ८१ वटाको मात्र पहिचान भएको जिल्ला वन कार्यालय, धुलिखेलले दिएको तथ्याङ्कमा उल्लेख छ । जडिबुटी मानव समुदायका लागि औषधिका रुपमा प्रयोग हँुदै आएको छ ।