काठमाडौँ २७ फागुन । कञ्चनपुरको आनन्द बजार पुनर्वास क्षेत्रमा विहिवार एसएसबीको गोलीबाट नेपाली नागरिकको मृत्यु भएको घटना विरोध गर्दै बिप्लब माओबादीले शनिवार नेपाल बन्दको घोषणा गरेको छ ।

शुक्रबार काठमाडौँको संवाद डबलीमा पत्रकार सम्मेलन गरेर पार्टीका प्रवक्ता प्रकाण्डले भारतीय सुरक्षा बल नेपाली भूमिमा प्रवेश गर्ने र एक्कासी गोली हानेर नेपाली नागरिक गोविन्द गौतमको निर्ममतापूर्वक हत्या गरिएको उल्लेख गर्दै हत्यामा सम्लग्न भारतीय एसएसवी र नेपाल प्रहरीका अधिकारीहरुलाई कडा काम गर्न माग गरे । हत्यामा सम्लग्नहरुलाई कारवाही नगरिएमा त्यसका विरुद्ध पार्टीले कडा आन्दोलनमा उत्रने उनले चेतावनी दिए ।

नेपालमाथि भारतले विभिन्न रुपमा हस्तक्षेप गर्दै आएको सन्दर्भ उल्लेख गर्दै प्रवक्ता प्रकाण्डले हस्तक्षेप नरोकेमा लाजिम्पाटमा रहेको भारतीय दुतावास रहन नसक्ने अवस्था आउने बताए । पार्टीले कञ्चनपुर घटनाका विरुद्धमा शुक्रबार दिउसो १ बजे देशभर विरोध प्रदर्शन समेत गरेको छ ।

नेपालमाथि भारतको हस्तक्षेपको श्रृङ्खला हत्याको स्तरसम्म पुग्दा पनि नेपाल सरकारले कुनै पहल नचालेको भन्दै प्रवक्ता प्रकाण्डले आक्रोश व्यक्त गरे । नेपाली भूमीमा भारतीय एसएसवी हतियार लिएर घुम्ने, नेपाली वस्तीमा दिनदहाडै आक्रमण गर्ने, घरहरु भत्काउने, नेपालीहरुमाथि लुटपाट मच्चाउने जस्ता अत्यन्तै आपत्तीजनक गतिविधिप्रति नेपाल सरकार चुपचाप भएको भन्दै उनले सरकारको धारणा माग गरे ।