पोखरामा ग्रेट हिमालयन महोत्सव हुने

पोखरामा ग्रेट हिमालयन महोत्सव हुने

२२ पटक पढिएको

काठमाडौँ, १५ मङ्सिर । पाँचौँ अन्तर्राष्ट्रिय ग्रेट हिमालयन महोत्सव आगामी मङ्सिर २४ देखि २६ गतेसम्म पोखरामा आयोजना हुने भएको छ । 

अन्तर्राष्ट्रिय पर्वतीय दिवसका अवसरमा नेपाल पर्वतारोहण सङ्घ (एनएमए) ले पोखरास्थित अन्तर्राष्ट्रिय पर्वतीय सङ्ग्रहालय परिसरमा महोत्सवको पाँचौँ संस्करण गर्न लागेको आज यहाँ आयोजित पत्रकार सम्मेलनमा जानकारी दिइएको छ । महोत्सव सफल पार्न सङ्घका अध्यक्ष सन्तवीर लामाको अध्यक्षतामा मूल समारोह समिति गठन गरिएको र समितिमा पर्यटन क्षेत्रका विभिन्न सङ्घसंस्थाका प्रतिनिधि रहेका छन् । महोत्सवको आवश्यक सम्पूर्ण तयारी पूरा भएको सङ्घका महासचिव कुलबहादुर गुरुङले बताउनुभयो । 

सो अवसरमा हिमाली क्षेत्रका समुदायको परम्परागत सांस्कृतिक नाचगान र झाँकीसहित खेल पर्यटनको पनि विकास गर्ने उद्देश्यले एशियाकै म्याराथन नायक बैकुण्ठ मानन्धरको नाममा ‘एनएमए बैकुण्ठ मानन्धर हिमालयन म्याराथन’ समेत आयोजना गरिने भएको छ । महिला र पुरुष दुवै खेलाडीको सहभागी हुने गरी पहिलोपटक ४५ किमीको म्याराथन दौड प्रतियोगिता आयोजना गर्न लागिएको सङ्घका महासचिव गुरुङले जानकारी दिनुभयो । 
नवील बैंकको प्रायोजनमा प्रथम, द्वितीय र तृतीयलाई क्रमशः रु एक लाख, रु ५० हजार र रु २५ हजार पुरस्कार प्रदान गरिनेछ । त्यसैगरी ‘एनएमए हिमालयन साइक्लिङ’ र ‘एनएमए टोनी हेगन टुरिज्म पन्टिङ’ आयोजना गरिने छ । विजयीलाई साइक्लिङतर्फ रु एक लाख १० हजार र पन्टिङतर्फ रु ५५ हजार पुरस्कार दिइनेछ । 

महोत्सवमा विज्ञान, प्रविधि, खानाका परिकार, सूचना केन्द्र, विभिन्न पर्यटकीय वस्तुसहितका ३० भन्दाबढी व्यावसायिक कक्ष रहनेछन् । गुरुङ, मगर, राई, लिम्बू, शेर्पा, थकाली तामाङलगायतका अन्य जनजाति तथा समुदायका सांस्कृतिक नाच तथा खानका परिकारलाई समेत प्रतिस्पर्धात्मकरुपमा राखिने र उक्त खानाका परिकारमध्ये प्रथम, द्वितीय र तृतीयलाई पुरस्कार तथा प्रमाणपत्र प्रदान गरिने छ । 

कार्यक्रममा लोपोन्मुख ‘तारो हान्ने छेलो हान्ने’ खेल तथा बोल्डरिङ क्लाइम्बिङसमेत समावेश गरिएको छ । नेपाल पर्यटन बोर्ड प्रमुख प्रायोजक तथा १२ भन्दाबढी संस्थाको सहयोग रहेको महोत्सवमा ५० हजारभन्दा बढी स्वदेशी तथा विदेशी सहभागी हुने अपेक्षा गरिएको छ । सन् २०१४ मा संयुक्त राष्ट्रसङ्घअन्तर्गतको संयुक्त राष्ट्र सङ्घीय विश्व पर्यटन सङ्गठनले प्रत्येक वर्षको डिसेम्बर ११ तारिखलाई अन्तर्राष्ट्रिय पर्वतीय दिवसका रुपमा मनाउने घोषणा गरेदेखि सङ्घले यो दिनलाई महोत्सवका रुपमा मनाउँदै आएको छ ।